საიტზე მიმდინარეობს ტექნიკური სამუშაოები

გოიასის შტატში საქართველოს საპატიო საკონსულოს გახსნა

2019 წლის 30 დეკემბერს ბრაზილიის ფედერაციული რესპუბლიკის შტატ გოიასის დედაქალაქ გოიანიაში საქართველოს  საგანგებო და სრულუფლებიანმა ელჩმა დავით სოლომონიამ საზეიმო ვითარებაში გახსნა საქართველოს საპატიო საკონსულოს ოფისი, რომელსაც უხელმძღვანელებს საქართველოს საპატიო კონსული მარსელო ლელის სერტაო.
გახსნის ცერემონიას ესწრებოდნენ ქ. გოიანიას და გოიასის შტატის მუნიციპალური და საკანონმდებლო ხელისუფლების, ასევე ბიზნეს-საფინანსო წრეებისა და კულტურის სფეროს წარმომადგენლები.
თავისი ეკონომიკური პოტენციალით გოიასის შტატს ერთ-ერთი წამყვანი ადგილი უკავია ბრაზილიის ფედერაციულ რესპუბლიკაში, რეგიონში აქტიურად ვითარდება ბიზნესი, მყარდება ახალი პარტნიორული კონტაქტები კომპანიებთან ქვეყნის ფარგლებს გარეთ, რაც საქართველოს ბიზნეს-სექტორთან თანამშრომლობის თვალსაზრისით მზარდ ინტერესს  იწვევს.
ქ. გოიანიაში საპატიო საკონსულოს გახსნა კიდევ ერთი წინგადადგმული ნაბიჯია ჩვენს ქვეყნებს შორის ურთიერთობებში და ხელს შეუწყობს საქართველოს პოპულარიზაციას ბრაზილიაში, ქვეყნის კულტურის და მრავალფეროვნების სათანადოდ წარმოჩენას, საქართველოს მოქალაქეთა და იურიდიულ პირთა უფლებებისა და ინტერესების დაცვას, სავაჭრო-ეკონომიკური,  კულტურული თანამშრომლობის განვითარებას, ტურიზმის წახალისებას და ხალხთა შორის კავშირების გაღრმავებას.
გახსნის საზეიმო ღონისძიება ფართოდ გაშუქდა ადგილობრივი მედია საშუალებების მიერ.