ქართული ფილმის ჩვენება
საქართველოს კულტურის სამინისტროსა და ეროვნული კინოცენტრის მხარდაჭერითა და ბრაზილიის ფედერაციულ რესპუბლიკაში საქართველოს საელჩოს ორგანიზებით, გაიმართა ღონისძიება, რომელიც ქართული კულტურისა და სპორტის მიმართულებებს მიეძღვნა.
საღამოზე, რომელსაც ესწრებოდნენ ბრაზილიის სახელმწიფო უწყებებისა და ქვეყანაში აკრედიტებული დიპლომატიური კორპუსის წარმომადგენლები, დამსწრე საზოგადოებას სიტყვით მიმართა საქართველოს ელჩმა, ზურაბ მჭედლიშვილმა და ორ ქვეყანას შორის არსებულ საერთო ღირებულებებზე ისაუბრა. ღონისძიების მონაწილეებს, ასევე, მიეწოდათ ინფორმაცია საქართველოში სპორტის განვითარების ისტორიასა და ქვეყნის ხელისუფლების მიერ სპორტის განვითარების მიმართულებით გადადგმულ ნაბიჯებზე.
ღონისძიების ფარგლებში, ქართველი რეჟისორის ნანა მჭედლიძის 100 წლის იუბილესთან დაკავშირებით, ნაჩვენები იქნა ქართული კინოს გამორჩეული ნიმუში - „პირველი მერცხალი“. საღამო დისკუსიის ფორმატში გაგრძელდა.